Kulturvandring og 25-årsjubileum 29. september 2018

Kulturvandring og 25-årsjubileum

29. september var det kulturvandring og markering av 25-årsjubileet for sogelaget. Arrangementet var gratis, og ope både for medlemar og andre. Turen gjekk først til Stamneshella, der me fekk ei grundig og interessant orientering om sandfrakt i Stamnes gjennom 150 år av Odd Helland. Orienteringa gjekk føre seg i klubbhuset til veteranklubben Sjøtun. 

Sigmund Simmenes orienterte om tettstaden Stamnes, og historia rundt den. Det var og høve til å sjå utstilling av skipsmotorar og ei restaurert ostraskute som er utstillt på same staden. Så gjekk turen til Straume, der Bjørg Dæmring Berge gav ei grei orientering om Skulemuseet, Kallestadstova og Verpelstadsamlinga mm.

Deretter reiste folket til Verpelstad gard til festmiddag. På menyen sto lammesteik med dessert og kaffi. På Verpelstad vart det og tid til orientering om sogelaget, aktivitetar i laget, utdeling av gåver mm.

Vassvøri sogelag fekk ei raus gåve av Vaksdal Historielag: Kr 100 for kvart år sogelaget har eksistert, dvs. kr 2500. I tillegg eit bilete av den freda Toskedalsstova, som nyleg er restaurert. Grethe delte ut gåver til dei tre omvisarane: Boka «Toget over vidda» til Bjørg og Sigmund, og medlemskap i Vassvøri sogelag til Odd Helland. Kåre fortalde om historia til garden Vepelstad. Då turen var open for andre enn medlemar, fekk me og 4 nye medlemar i laget denne dagen.

På kulturvandringa møtte det 29 personar, og til middagen 27, inkludert omvisarane på kulturvandringa. Desse tre er alle medlemar i Vaksdal Historielag, og Sigmund Simmenes er leiar. Odd Helland orienterte og om dragebryggja på Straume. Dårleg ver gjorde at denne orienteringa høvde best å ta innandørs. Grethe takka til slutt for godt frammøte, og ynskte alle vel heim. 

Ref: Kåre Olav Aldal

Alle foto: Grethe Agerli